أخبار عاجلة

نجوم من مصر

نجوم من مصر
نجوم من مصر

وإحنا الشهود اللى عشنا على امتداد عصرك

وكإن مصر قديمها جديدها دى مصرك

من كليوباترا لكرنك للروابى الخضر

علمتنا من غنا لغنا... بننتظرك

يا صاحب الوطن الأكبر وساعة العمل

إنت مثال حى للى ماعرفش الملل

من جيل لجيل والحياة من جيل لجيل تتوصل

ولا التخلف قدر يطويك ولا يحاصرك!!

■ ■ ■

عبدالوهاب.. حتى اسمك كان جميل زيك

كل الشباب اللى جُم.. مشيوا على ضيّك

لما تغنى «خىّ».. أحسّ.. أنا خيك

من بعد سيد أبودرويش سلكت الدرب

تحب وكأن ماحد قبلك فى بلادنا.. حَبّ

أكيد زرعت النبات لكنّه فسد الحب

وأظن دوشة زماننا الآن.. والزعيق واصلك

كلنا نحب القمر

والقمر بيحب مين؟!

واسم القمر «عبدالوهاب»

نجم النجوم

اللى أتى له النغم يزحف إليه طايع

اللى ما يوم أبداً فناننا كان ضايع

ورغم عمره الطويل عمره ما ضيع وقت

موسيقاه وأغانيه أهه

عايشة لحد الوقت

عايشة قوى وحتعيش

مش راح تدوب حتى الزمن لو داب

أنا اللى للنحنحة زى الجميع اشتقت

مين كان يقول القمر نوره الجميل يظل

مهما القمر هجر الليالى وغاب..

«وطنى حبيبى الوطن الأكبر

يوم عن يوم أمجاده بتكبر»

صحيح كانت أيام

«طول ما أملى معايا

وفى إيديا سلاح

هافضل أجاهد وامشى

من كفاح لكفاح»

يا جاى ع الجندول

ومعدّى ع «الكرنك»

القلب بينادى..

وانت بترمى السلام

على «جارة الوادى»

وانت بتخلد «كليوباترا»

بريشة عودك

مشوار طويل سيما وغنا وألحان

صوتك رقيق حتى وانت تغنى للأوطان

عبدالوهاب

ياللى غلبت الزمن جيل بعد جيل وجميل

وكل مادة الغنا يديك بغير حساب

غنيت وخليت غيرك

يغنى من خيرك

كل الطيور اللى غنت

تعتبرك طيرك

يا مطرب الأجيال.

أين تذهب هذا المساء؟.. اشترك الآن

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

التالى بالصور.. فاروق حسنى يقرأ مستقبل الثقافة والفن فى أتيليه الإسكندرية