أيمن نور الدين يكتب : اللى عملته الشهيدة هند موسى !

أيمن نور الدين يكتب : اللى عملته الشهيدة هند موسى !
أيمن نور الدين يكتب : اللى عملته الشهيدة هند موسى !


ايه ده ؟
الصحفيين واقفين مع بعضهم عشان خاطر حق زميلة أو زميل ؟!
طب وفيها ايه ؟!
 لا بس بقالنا كتير مشفناش منظر زى كده !
أصلهم بيقولوا ان فيه زميله .. أخلاقها عالية أوى ونشيطة فى شغلها أوى .. ماتت فى حادثة عربية تبع المهرجان اللى كانت بتغطيه 
وبيقولوا كمان ان لولا الإستخسار فى معاملة الصحفيين زى الفنانين مكنش عرضوا الصحفيين لأخطار 
وان المهرجانات من غير الصحفيين .. ولا حاجه ومتسواش 
 وحكاية ان الفنانين يركبوا طيارات والصحفيين كريم وعربيات ده يعتبر تمييز من مهرجان رافع شعار الإنسانية وشكلها عيب ! 
وبعدين .. ايه اللى حصل ؟!
الموضوع كبر  من وقتها .. والحادثة وجعت ناس كتير أوى 
و موت هند موسى فى عز شبابها وهى راجعه من شغلها .. داس عالجرح .. وخلى ناس كتيرة تقول كفاية لحد كده بقى .. !
ومش حنقبل بكده تانى 
 ومبقاش الموضوع يخص هند موسى وحدها .. ده موتها فجر قضية  معاناة أهل مهنة الصحافة والطريقة اللى بيتعامل بيها صحفيين الفن فى الوسط الفنى 
 طب وحصل ايه كمان ؟
اعلام المصريين طلعت قرار بتكفلها بمعاش لأسرة هند موسى 
ومهرجان الأسكندرية أطلق إسم الشهيدة  على اللجنة الإعلامية فى دورته 
 ده غير مطالبات من صحفيين ان نقابة الصحفيين تدين اللى حصل وتطالب بمعاملة الصحفيين بالمثل فى كل المحافل الثقافية والفنية 
ولسه .. فيه حاجات تانية حتحصل 
يعنى معنى كده ان هند موسى جمعت قلوب صحفيين الفن وخليتهم على قلب رجل واحد ؟
أيوة ده حصل 
وموتها .. خلى الصحفيين يغضبوا  ويرفضوا أى مساس بكرامتهم أو كرامة أى زميل ؟
ده حقيقى 
يعنى موضوع هند موسى .. مش هوجة تاخدلها يومين وتعدى وخلاص ؟!
لأ .. هند موسى .. كإنها ماتت عشان حقوق زمايلها الصحفبين 
يعنى مش بس  شهيدة ماتت فى طريق رجوعها من العمل لا دى بقت شهيدة الدفاع عن حقوق زمايلها . 
هند موسى نحتسبها بإذن الله شهيدة غصبن عن أى حد 

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

التالى أيمن نور الدين يكتب .. احلى غنوة لم تغنيها أنغام !

معلومات الكاتب